خلي الاولادي يباتو ليله
حكايات مالك السفير
بس.
منى.
الجزء الثاني والأخير
في اللحظة اللي عمر شاف فيها اسم منى عبدالسلام على كشف الحساب القديم، حس إن الأرض اتسحبت من تحت رجليه.
قلب الورقة مرة واتنين.
وبعدين قربها من عينه.
الاسم كان واضح.
منى عبدالسلام.
وتحته مباشرة
تحويل بمبلغ 1850000 جنيه إلى الحساب التأسيسي لشركة الشناوي للتجارة.
التاريخ؟
قبل تأسيس الشركة بأيام قليلة.
عمر فضل باصص للورقة من غير ما يتكلم.
المبلغ كان تقريبًا هو نفس المبلغ اللي حسام قال له من 17 سنة إنه أخده سُلفة من خاله.
لكن المفاجأة ماكانتِش في الفلوس.
المفاجأة كانت في خانة تانية.
الغرض من التحويل مساهمة تأسيسية.
عمر همس
مساهمة؟
فتح الملف القديم اللي كان محتفظ بيه من وقت تأسيس الشركة.
قلب الأوراق بسرعة.
لحد ما وصل لصفحة عقد التأسيس.
وهنا
اتجمد.
كان فيه اسم منى.
مش كزوجة حسام.
ولا كضامنة.
ولا كمجرد شخص حوّل فلوس.
كانت مكتوبة بصفتها
شريكة مؤسسة.
عمر قرأ النسبة مرة.
وبعدين مرة تانية.
45.
رفع عينيه للفراغ.
مستحيل
في اللحظة دي، دخل مساعده رامي المكتب.
أستاذ عمر، حضرتك طلبت الملفات القديمة؟
عمر حط الورقة قدامه.
أيوه. وعايزك تعمل حاجة تانية.
اتفضل.
هاتلي كل مستند خرجت منه منى من الشركة من أول يوم لحد النهارده.
رامي استغرب.
كل المستندات؟
كلها.
حتى اللي من 17 سنة؟
عمر بص له بحدة.
خصوصًا اللي من 17 سنة.
بعد ساعتين
كان المكتب مليان ملفات.
عمر فتح أول ملف.
عقد التأسيس.
توقيع منى.
فتح اللي بعده.
محضر اجتماع.
توقيع منسوب لمنى.
فتح الثالث.
تنازل عن حصتها.
توقيع منسوب لمنى.
عمر قرب الورقة من عينه.
وسكت.
رامي لاحظ تغير وشه.
في حاجة؟
عمر رفع الورقة.
أنا شوفت توقيع منى الحقيقي امبارح.
و؟
التوقيع ده مش توقيعها.
رامي قرب منه.
عمر قال
هاتلي خبير خطوط فورًا.
في نفس الوقت
كانت منى قاعدة في المطبخ مع ياسين وملك.
ياسين كان بيحكي لأخته الصغيرة عن المدرسة، وملك كانت بتلعب بالمعلقة.
لأول مرة من كام يوم، الأطفال كانوا هاديين.
لكن منى نفسها ماكانتِش هادية.
كانت حاسة إن في حاجة كبيرة بتحصل.
وبعد حوالي ساعة
سمعت عربية عمر وهي بتدخل.
الباب اتفتح.
عمر دخل بسرعة.
وكان معاه ملف أسود.
بص لمنى وقال
محتاج أكلمك.
منى وقفت.
في إيه؟
حط الملف على الترابيزة.
فاكرة لما قولتيلي إنك بعتي شقة والدك ووالدتك عشان تساعدي حسام يبدأ شركته؟
