فلوس الولاده

أبويا قاطعه بلهجة قاطعة لا تقبل النقاش

أنت فاكر إيه يا عادل؟! فاكر إن بيت الراجل اللي على المعاش محتاج 3 تلاف جنيه بتوعك عشان ياكل ويشرب؟! أنا ربيت بنتي 25 سنة، عمري ما حسبت عليها لقمة، ولا حسستها إنها حمل عليا. كنت

بشقى وأتعب عشان أدخلها أحسن مدارس وأجيب لها أحسن أكل. وأما جوزتهالك، جوزتهالك عشان أسلّم أمانتي لراجل يصونها ويبقى ضهر وسند ليها ولعيالها، مش لواحد يرجع من السفر بعد غياب شهر يحاسب مراته اللي طالعة من ولادة وموت على بامبرز ابنه وعلبة لبن صناعي!.

الدموع نزلت من عيني زي الشلال، وكنت ببص لأبويا بفخر وامتنان ملوش حدود، وفي نفس الوقت ببص لعادل بقرف وندم إني اخترت الإنسان ده وربطت حياتي بيه.

أمي اتكلمت ساعتها بحرقة

بنتي قعدت عندي في عز تعبها، كنت بقوم أسهر بالولد عشان هي ترتاح وتنام، كنت بعمل لها الحمام والشوربة البلدي كل يوم من مالي الخاص عشان يجيلها لبن ترضع ابنك، وفي الآخر جاي تقول واكلين على قفاك؟! يا خسارة يا عادل.. يا خسارة تربية الراجل المحترم ده فيك!.

عادل كان وشه في الأرض ومش قادر يرفع عينه في عين أبويا، مد إيده عشان يرجع الفلوس لأبويا وهو بيقول بصوت مكسور

حقك عليا يا عمي.. أنا غلطان.. والله العظيم شيطان ودخل بيننا، وأنا كنت مضغوط في الشغل ومصاريف السفر دوشتني.. امسحها فيا يا أبويا.. متزعلش مني.

أبويا قام وقف، وبص لعادل من فوق لتحت وقال جملة نزلت على عادل زي الصاعقة

شيل فلوسك يا عادل.. الفلوس بتروح وتيجي، بس الأصول لو راحت مبترجعش،

والكرامة لو اتكسرت ملهاش تمن. بنتي وابنها هيرجعوا معايا البيت دلوقتي، مش عشان غضبانين.. لأ، عشان بنتي تفوق من صدمتها، وأنت تفضل مع نفسك هنا في الشقة تراجع حساباتك وتتعلم يعني إيه تكون رب بيت وراجل يتحمل مسؤولية عيلة.. ولما تعرف قيمة النعمة اللي في إيدك، تبقى تيجي تخبط على بابي وتطلبها زي ما طلبتها أول مرة، بس ساعتها هتكون الحسبة تانية خالص.

أبويا بص لي وقال بحنية قومي يا سمر.. لفي الولد وخدي حاجتك وتعالي ورايا.

عادل حاول يقف قدامنا ويترجى أبويا يا عمي أبوس إيدك، الناس هتقول إيه؟! ما تخرجش بنتك من بيتي، أنا آسف والله هبوس راسها قدامك أهو!.

أبويا حط إيده على كتفه وزقه بالراحة وقال له الناس مبتاكلش معانا عيش يا عادل.. خلي الناس تنفعك. عيّل بيتك وعقلك الأول، وبعدها بيوت الناس تفتح لك أبوابها.